Ég er stúdent frá Menntaskólanum í Kópavogi og B.Ed. frá Kennaraháskóla Íslands. Nú stunda ég mastersnám í fullorðinsfræðslu við Háskolann í Linköbing í Svíþjóð í fjarnámi og framhaldsnám í náms- og starfsráðgjöf við Háskóla Íslands.

Eftir kennarapróf fluttist ég til Vestfjarða og var skólastjóri Í Holti, Önundarfirði 1992-1995 og var síðan kennari í Bolungarvík til ársloka 1997. Frá árinu 1998 hef ég starfað sem forstöðumaður Svæðisvinnumiðlunar Vestfjarða. Ég bý á bóndabænum Hanhóli í Syðridal, Bolungarvík. Hanhóll er 5 km frá Bolungarvík og um 18 km frá Ísafirði. Á Hanhóli er sauðfjárbúskapur.

Ég hef starfað lengi að félagsmálum einkum atvinnumálum kvenna. M.a. hef ég átt sæti í eftirfarandi stjórnum, nefndum og ráðum:Jafnréttisnefnd Kópavogs, heilbrigðisnefnd Kópavogs, stjórn SUS, stjórn LSK, ritnefnd 19. júní, stjórn nemendafélags KHlI, stjórn Átaksverkefnis í atvinnumálum kvenna, Snerpu, stjórn At-kvenna, sjálfseignarstofnun, stjórn Atvinnuþróunarfélags Vestfjarða, stjórn Fræðslumiðstöðvar Vestfjarða, ráðgjafanefnd Fjölmenningarseturs á Vestfjörðum, stjórn, Skógræktarfélags Bolungarvíkur stjórn Róta, áhugafélags um menningarfjölbreytni auk þess að taka þátt í ýmsum starfsnefndum. Nú er ég m.a. í nefnd um brottfall nemenda úr framhaldsskólum. Ég tek einnig virkan þátt í starfi Zontaklúbbsins Fjörgynjar á Ísafirði. Árið 2000 var ég ein þriggja kvenna sem hlaut Auðarverðlaunin, auður í krafti kvenna.

AUÐUR í krafti kvenna - AUÐARverðlaunin 2000

Helstu áhugamál mín eru atvinnu- og félagsmál, stjórnmál, sagnfræði og ættfræði.

Ég ligg sjaldan á skoðunum mínum, enda af alræmdu húnversku kjaftakyni frá Guðlaugsstöðum í Blöndudal, en um það hefur svo verið ort:

Með óstöðvandi orðadyn

öslar á hundavaði,

þetta fræga kjaftakyn

kennt við Guðlaugsstaði.

Fjölskylda

Sjá nánar um móðurættina (Guðlaugsstaðakynið) á vefsíðunni www.simnet.is/annalar/hvassahraun

Ég er fædd 9.4.1962. Eiginmaður minn er Jóhann Hannibalsson, f. 27.7.1954, bóndi og snjóathugunarmaður. Ég á fjórar dætur, Ástu Björgu f. 3.1.1986, Ósk f. 5.3.1996 d.5.3.1996, Magneu Gná f. 3.4.1997 og Þorsteinu Þöll f. 26.4.1999. Systkini mín eru Salvör Kristjana, f. 26.2. 1954, viðskiptafræðingur, lektor við KHÍ og sérfræðingur í forsætisráðuneytinu, í sambúð með Magnúsi Gíslasyni rafmagnsverkfræðingi og á hún tvær dætur, Ástu Lilju f. 29.12.1973 og Kristínu Helgu f. 15.10.1989, Kristinn Dagur, f. 11.7. 1957, steypustöðvarstjóri Kópavogi; Hannes Hólmsteinn , f. 19.2. 1953 stjórnmálaheimspekingur og prófessor við HÍ.

Foreldrar mínir eru Gissur Jörundur Kristinsson, f. 11.7. 1931, d. 28.7.1993 en hann var húsasmiður og framkvæmdastjóri Verkamannabústaðanna í Kópavogi, og kona hans, Ásta Hannesdóttir, kennari f. 26.7.1926 d.28.9.2000.

Föðurætt

Gissur er sonur Kristins, vélstjóra í Reykjavík, Guðbjartssonar, b. á Sléttu í Aðalvík, Péturssonar, Eldjárnssonar. Móðir Kristins var Kristjana Kristjánsdóttir, b. á Sútarabúðum í Grunnavík, bróðir Péturs Eldjárnssonar.

Móðir Gissurar var Salvör Gissurardóttir, b. á Hvoli í Ölfusi, Gottskálkssonar, b. í Sogni, Gissurarsonar, b. á Reykjum, Þóroddssonar. Móðir Gissurar á Reykjum var Guðrún Sigurðardóttir, systir Bjarna riddara Sívertsen. Móðir Salvarar var Jórunn Snorradóttir, b. á Þórustöðum í Ölfusi, Gíslasonar, b. á Kröggólfsstöðum, Eyjólfssonar, b. á Kröggólfsstöðum, Gíslasonar, ættföður Kröggólfsstaðaættarinnar. Móðir Snorra var Solveig, systir Ólafar, langömmmu Guðrúnar, móður Bjarna Benediktssonar forsætisráðherra, föður Björns ráðherra. Móðir Jórunnar var Kristín, systir Björns, afa Bíla-Steindórs, afa Geirs Haarde ráðherra. Kristín var dóttir Odds, b. á Þúfu í Ölfusi, Björnssonar. Móðir Odds var Guðrún Eyjólfsdóttir, systir Gísla á Kröggólfsstöðum. Móðir Kristínar var Jórunn Magnúsdóttir, b. í Þorlákshöfn, Beinteinssonar, lögréttumanns í Þorlákshöfn, Ingimundarsonar, b. í Hólum í Stokkseyrarhreppi, Bergssonar, ættföður Bergsættar, Sturlaugssonar.

Móðurætt

Ásta er dóttir Hannesar, b. á Undirfelli í Vatnsdal, bróður Björns, fyrrv. alþingismanns á Löngumýri, og Huldu, móður Páls Péturssonar þingflokksformanns. Hannes var sonur Páls, b. á Guðlaugsstöðum í Blöndudal, bróður Guðmundar prófessors. Faðir Páls var Hannes, b. á Eiðsstöðum, Guðmundsson, alþingismanns á Guðlaugsstöðum, Arnljótssonar, b. á Guðlaugsstöðum, Illugasonar, b. á Guðlaugsstöðum, Hannessonar.

Móðir Hannesar var Guðrún Björnsdóttir, b. í Grímstungu í Vatnsdal, Eysteinssonar, bróður Ingibjargar, langömmu Friðriks Sophussonar fjármálaráðherra.

Móðir Ástu var Hólmfríður Jónsdóttir, b. á Undirfelli, Hannessonar. Móðir Hólmfríðar var Ásta Bjarnadóttir, b. í Þórormstungu, bróður Kolfinnu, móður Bríetar Bjarnhéðinsdóttur. Bjarni var sonur Snæbjarnar, b. í Forsæludal, bróður Margrétar, móður Arnljóts Ólafssonar, prests á Bægisá.

Slóðir:

Vinnumálastofnun

Atvinnuþróunarfélag Vestfjarða

At-konur áhugahópur um atvinnumál kvenna Vestfirðir

Fjölmenningarsetur á Vestfjörðum

Fræðslumiðstöð Vestfjarða

Fjarnám sem ég stunda 2001-2002

Fjarnám í fullorðinsfræðslu við Linköping háskóla - Blackboard
Dagbók (vefannáll) fyrir fjarnám í Linköping
Skrifa í dagbókina

Fjarnám við HÍ í náms- og starfsráðgjöf - WebCT
Dagbók (vefannáll ) fyrir fjarnám við HÍ
Skrifa í dagbókina

Breyta færslum í dagbókum - blogger.com

Hluti af ættfræðiupplýsingum eru fengnar úr Ættfræðivef DV.

Myndirnar eru úr tölvumyndasafni Salvarar Kristjönu.

Síðast uppfært 19-oct-01